“ලක්කම් කර්මාන්ත හා වෙළඳ ප්‍රදර්ශනය” බත්තරමුල්ල දියත උයන පරිශ්‍රයේ දී හෙට (29) පෙරවරුවේ ආරම්භ වේ. මෙම ප්‍රදර්ශනය 2021 මාර්තු මස 29, 30 හා 31 දිනයන්හි දී පෙ.ව. 10.00 සිට ප.ව. 9.00 දක්වා පැවැත්වේ.
සෞභාග්‍ය දැක්ම ප්‍රතිපත්ති ප්‍රකාශනයට අනුව දේශීය ආර්ථිකය නඟා සිටුවීමේ ජාතික වැඩසටහනට සමඟාමීව මෙම ප්‍රදර්ශනය ක්‍රියාත්මකය. ලංකා කාර්මික සංවර්ධන මණ්ඩලය මගින් දේශීය නිෂ්පාදන කර්මාන්තයන්හි නිරත ව්‍යවසායකයින්ට අලෙවි අවස්ථා වැඩි කරගැනිම හා නව කර්මාන්ත අවස්ථා හඳුන්වා දීම මෙහි ප්‍රමුඛ අරමුණකි. මෙම අළෙවි ප්‍රදර්ශනයේ දී දේශීය රෙදිපිලි හා ඇඟළුම් , පාවහන් හා සම් භාණ්ඩ, රබර් ආශ්‍රිත නිෂ්පාදන, ආහාර වර්ග, අත්කම් භාණ්ඩ, විසිතුරු මැටි භාණ්ඩ ඇතුලු ඉහළ ප්‍රමිතියකින් යුතු නිෂ්පාදන රාශියක් අඩු මිලට මිල දී ගත හැකි වේ.
මීට අමතරව නව ව්‍යාපාරයක් ආරම්භ කිරීමට හෝ ව්‍යාපාර අදහසක් ලබා ගැනීමට අවශ්‍ය වන උපදෙස් හා සේවාවන්ද එම ස්ථානයේදී ලබා ගත හැකිවේ. සමාරම්භක උත්සවයේ ප්‍රධාන ආරාධිත අමුත්තා ලෙස කර්මාන්ත අමාත්‍ය විමල් වීරවංශ මහතා එක්වනු ඇත. මෙම අළෙවි ප්‍රදර්ශනයට පැමිණ භාණ්ඩ මිලදීගෙන දේශීය කර්මාන්තකරුවන්ට ශක්තියක් ලබා දෙන ලෙස ලංකා කාර්මික සංවර්ධන මණ්ඩලය ඉල්ලා සිටියි.
