ගුවන් සේවිකාවන් බදවා ගන්නා බවට ෆේස්බුක්හි දැන්වීමක් පලකර ඊට ප්‍රතිචාර දක්වන කාන්තාවන්ව උපක්‍රම ශීලීව රවටමින් නිරුවත් ඡායාරූප වට්ස්ඇප් මගින් ලබාගෙන එම ඡායාරූප ප්‍රසිද්ධ කරන බව කියා කාන්තාවන් බිය ගන්වමින් ඒ අයගෙන් ලිංගික පහස සහ මුදල් ඉල්ලා තර්ජනය කිරීමක් සම්බන්ධයෙන් ජල මණ්ඩලයේ මනු කියවන්නෙකුව අපරාධ පරීක්ෂණ දෙපාර්තමේන්තුවේ නිලධාරීන් කණ්ඩායමක් විසින් ඊයේ අත්අඩංගුවට ගෙන තිබේ.
හගුරන්කෙත පදිංචිකරුවෙක් වන මෙම සැකකරු අත්අඩංගුවට ගෙන කළ පරීක්ෂා කිරීම්වලදී මෙම අපරාධය සඳහා ඔහු යොදාගත් ජංගම දුරකතන 04ක්ද ජංගම දුරකතන සිම්කාඩ්පත් 13ක්ද සොයා ගැනීමට හැකිවී ඇත.
එම ජංගම දුරකතන වල ඔහුගේ රැවටීමට ලක්වූ කාන්තාවන් 20 දෙනෙකුගේ විවිධ ඉරියව් සහිත නිරුවත් ඡායාරූප විශාල ප්‍රමාණයක් තිබී හමුවී ඇත.
මෙම මනුකියවන්නා විසින් “රුවැත්තියන්ගේ ගැටළු “ නමින් මුහුණු පොතේ ගිණුමක් විවෘතකර ඊට ගුවන් සේවිකාවන් බදවා ගැනීමේ දැන්වීම පලකරමින් මෙම ක්‍රියාවේ නරතව ඇති බව විමර්ශනවලින් අනාවරණය වී තිබේ.
එම දැන්වීම දැක ගුවන් සෙවිකාවන් වීමට අපේක්ෂාවෙන් සිටින තරුණ කාන්තාවන් ඉල්ලුම්පත් යොමු කළ විට ඒ අයගේ මෑතකදී ලබාගත් ඡායාරූපයක් මුලින්ම ඉල්ලා පසුව අඩ නිරුවත් සහ නිරුවත් ඡායාරූප ඔහු විසින් වට්ස්ඇප් ඔස්සේ ගෙන්වාගෙන ඇති බව අපරාධ පරීක්ෂණ දෙපාර්තමේන්තුව විසින් කළ විමර්ශනයේදී පෙනී ගොස් ඇත.
මෙසේ මෙම මනුකියවන්නගේ රැවටීමට හසුවුණු මාතලේ සහ මහනුවර පදිංචි තරුණියන් දෙදෙනෙක් අපරාධ පරීක්ෂණ දෙපාර්තමේන්තුවට මෙයට මාස 03කට පෙර කළ පැමිණිල්ලක් සම්බන්ධයෙන් කළ දීර්ඝ විමර්ශනයකින් පසු මෙම මනුකියවන්නාව අත්අඩංගුවට ගැනීමට හැකිවූ බවද ලකී රන්දෙණිය මහතා කීය.
අත්අඩංගුවට ගැනීමෙන් පසු කළ ප්‍රශ්න කිරීමේදී මනුකියවන්නා පවසා ඇත්තේ වසරක කාලයක් තිස්සේ තමන් මෙම අපරාධය සිදුකරන බවත් තරුණියන් සහ කාන්තාවන් විශාල පිරිසක් තමාට හසුවී ඇති බවත්ය. පුරුද්දක් හැටියට තමා මේ කටයුත්කරගෙන යන බවද ප්‍රශ්න කිරීමේදී ඔහු පවසා ඇත. වෙනත් පුද්ගලයින්ගේ හැදුණුම්පත් යොදාගෙන ජංගම දුරකතන සිම්කාඩ්පත් යොදා ගනිමින් ඔහු මෙම කටයුත්ත කර ඇතිවද පෙනී ගොස් ඇත.
වසරක කාලයක් තිස්සේ ඔහු මෙම ක්‍රියාවේ නිරත වී ඇති අතර නිරුවත් ඡායාරූප මේ තැනැත්තා අතට පත්වීමෙන් පසු මුදල් සහ ලිංගික පහස ඉල්ලා තර්ජනයකර ඇති බව අපරාධ පරික්ෂණ දෙපාර්තමේන්තුව සඳහන් කරයි. මෙම පුද්ගලයාගේ ගොදුරක් බවට පත්වුණු මහනුවර සහ මාතලේ තරුණියන් දෙදෙනෙක් විසින් කළ පැමිණිල්ලට අනුව මෙම සැකකරු අත්අඩංගුවට ගෙන ඇත.
