(අශෝක ජයතුංග වොෂින්ටන් DC සිට..)
ඇමෙරිකාවේ විවිධ සාද, උත්සව හා සමාජ එකතුවීම් සංවිධානය කරන “International club of DC” විසින් වොෂින්ටන් ශ්‍රී ලංකා තානාපති පරිශ්‍රයේදී ඇමෙරිකානුවන් රැසක් වෙනුවෙන් සංවිධානය කළ සැදෑවකින් ශ්‍රී ලංකාවට විශාල සංචාරක හා ආයෝජන ප්‍රවර්දනයක් ලැබිණ.
එහිදී කතාකල තානාපති මහින්ද සමරසිංහ මහතා විසින් ශ්‍රී ලංකාවේ ගස්වැල් මල්වලින් හා පිරිසිදු වාතයෙන් යුතු සමශීතෝෂ්ණ පරිසරය හා සෞඛ්‍ය සම්පන්න ප්‍රනීත ආහාර පාන භුක්ති විදීමට ඇමෙරිකානුවන්ට ශ්‍රී ලංකාවේ සංචාරයට හා අපගේ දක්ෂ ශ්‍රම බලකායෙන් ප්‍රයෝජන ගනිමින් ආයෝජන ගෙනෙන ලෙස ද ආරාධනා කළේය.
” ශ්‍රී ලංකාවට අදාළ මේ පණිවිඩය ඔබේ සෙසු ඇමෙරිකානු ඥාතීන් හා මිතුරන් අතරටත් යවන්න. ඇමෙරිකාවට ඇත්තේ වසර 246 ක ඉතිහාසයක් වුණත් ලංකාවට වසර 2500 ක ප්‍රෞඪ අතීතයක් තියෙනවා. පෘතුගීසීන් නෙදර්ලන්තය හා බ්‍රිතාන්‍ය අපේ රට වසර 450 ක් යටත් කරගෙන පාලනය කලා. ඒ කාලය තුළ අපේ බෞද්ධ භික්ෂූන් හා ජනතාව රටේ දේපොළ මෙන්ම අපේ සංස්කෘතිය හා උරුමයන් රැකගත්තා. ඒ පෞඩ ඉතිහාසයේ නටබුන් ලංකාවට පැමිණ නරඔන්න” තානාපති මහින්ද සමරසිංහ මහතා ආරාධනා කළේය.
ශ්‍රී ලංකාවේ බෙර වාදන නර්ථනාංග සංගීතය හා ගායනා ඇතුළු සංස්කෘතිකාංග රැසක් ද එහිදී ඉදිරිපත් කෙරිණ.
සියලු දෙනාට ශ්‍රී ලංකාවේ උණුසුම් හා ශීතකල තේවලට අමතරව ශ්‍රි ලංකාවේ ආහාරවලින් ද සංග්‍රහ කෙරිණ.
ලංකාවේ පරිසරය වෙහෙර විහාර පැරණි නටබුන් සතුන් සිවුපාවුන් හා ලෝක උරුම 08 හා සැතපුම් 800 ක මනරම් මුහුදු වෙරළ ගැන ඡායාරූප ප්‍රදර්ශනයක් ද තානාපති කාර්යාලය විසින් සංවිධානය කොට තිබිණ.
